Kada pais tin su baluartenan ku ta persona ku a nifiká hopi pa desaroyo di un pais òf region pa loke ta trata diferente área. Na Kòrsou nos tin diferente baluarte ku tin kaya òf plenchi na nan nòmber. Tambe bo ta topa nan busto òf estatua na sierto sitionan. Ta importante pa bo konosé bo baluartenan i pa bo sa kiko nan a nifiká pa bo pais. Tambe nos por siña hopi di nan karakter ku elementonan manera: sabiduria, kurashi, forsa mental, kuriosidat, kreatividat, perseveransia i amor pa nan próhimo.
Pa loke ta trata baluartenan ku a lucha pa libertat i derechi di siudadano nos ta duna atenshon na: Tula, Pedro Luis Brion, Manuel Carlos Piar i Felix Chacuto, Moises Frumencio da Costa Gomez, Ong A Kwie, Papa Godett i Amador Nita. Riba área di literatura i kultura: Frank Martinus Arion, Elis Juliana, Paul Brenneker.
Naturalmente Kòrsou konosé muchu mas baluarte ku esnan aki menshoná, pero nos a hasi un eskoho i ta duna atenshon na algun di nan ku ta mas konosí den nos historia pa loke ta trata área di derechi humano i kultura.
