Skip to content Skip to footer

Tradishon Spiritual

Tin diferente forma di spiritualidat krioyo popular ku ta eksistí banda di religionnan. E hende ta buska yudansa serka trahadónan spiritual (medium) ku por hasi kontakto ku sierto misterio pa buska aklarashon i solushon pa nan problema personal. Den mayoria di kaso ta trata di religion afro-kurasoleño ku nan ta praktiká skondí.

E formanan aki di venerashon ta mará na naturalesa i tin un relashon fuerte ku kultura di Afrika. Nan a eksistí for di tempu di sklabitut, pero komo ku tabata parti  di kultura Afrikano, e práktikanan tabata prohibí.

Práktikanan spiritual

Na Kòrsou nos ta yama e práktikanan spiritual aki: brua, montamentu òf misterio. Na Kòrsou e práktikanan ritual aki a kuminsá for di temporada di indigeno. E pueblo indigeno tabata usa yerbanan pa kura hende i tambe pa kai den trans. Un gran parti di e práktikanan spiritual a yega aki ku Afrikanonan sklabisá. Despues di tempu a bini influenshanan di migrantenan for di Haiti, Repúblika Dominikana, kosta nort di Venezuela i Colombia. De Karibe bo ta topa diferente vershon di brua. Na Cuba “La Regla Lukumi” òf  “Santeria” òf Palo Monte, Brasil tin macumba ku candomblé, Sürnam Winti, Haiti Vudu, Antia Ingles e yama Obeah. Na Guadeloupe y Martinique i esun Haitiano tin e nòmber di “Quimbois”.