Skip to content Skip to footer

Herensia Kultural

Herensia kultural ta tur kos material i no-material ku ta produkto di ekspreshon di hende. Ta trata di elemento ku ta relashoná ku entre otro arkeologia, historia, literatura, edukashon, arte, siensia i kultura en general. Herensia kultural ta formá pa un grupo di hende ku den kurso di siglonan a desaroyá un propio manera di biba den sierto teritorio. Herensia kultural ta entre otro nan manera di sòru pa kuminda, konstrukshon di kas, transporte, kushiná, idioma, baile, muzik, religion. Tin produkto di herensia kultural ku artefakto di hopi aña òf siglo pasa. Dokumentu, buki i otro publikashon bieu di balor. Archivo di potrèt, disko, publikashon importante. Tambe arkitektura manera monumento.

E herensia aki ta bini di e hendenan na Kòrsou di ántes. Herensia kultural ta enserá tambeasuntunan no-material, asuntu spiritual manera kerensia, idea, pensamentu, idioma, sistema dipapia etc.

Herensia kultural material ta lokual ku por mishi kuné. Por ehèmpel un fòrti, un vestuario òf un edifisio. Bo por warda i restourá e material. Herensia kultural no-material no por mishi kuné. Por ehèmpel un kantika, un manera di planta òf di kushiná. Bo no por warda e herensia kultural -no material mes, pero sí bo por warda su konosementu ku potrèt, pelíkula i material ouditivo.

Dikon herensia kultural ta importante?
E herensia kultural ta mustra nos kon nos antepasadonan a biba i pensa. Kon nan a trata ku nan naturalesa. Nan tin sabiduria di ántes ku mester ta konosí pa esnan ku ta biba awe komprondé nan mes mihó, siña sa ken nan ta. Herensia kultural ta importante den formashon di bo identidat. Konosé bo mes pa asina bo por siña apresiá bo mes.