Skip to content Skip to footer

PPa Afrikanonan sklabisá tabata tin un paña di lenen  gròf spesial, ku nan tabata yama kaaimaas. Hende hòmber tabata bisti un kalambé pa traha den kunuku. Esaki ta un pida paña ku e ta mara riba su karson for di su sintura te na su rudia. E ta mar’e ku un pida kuerdo na su sintura. Tambe e tabata bisti, en bes di kalambé, un waiki (wayuko). E waiki ta traha di un pida paña di pita òf paña di saku di hariña.

Hende muhé tabata bisti un saya largu ku djèki. Bou di nan saya nan tabata tin un òf dos saya djabou (sombra). Hopi hende muhé tabata bisti un duki riba kabes. Mayoria tabata mara lensu di kabes di madras. E lensu di kabes di madras tabata kolonan hel ku kora. Madras ta nòmber di e tela di lensu for di India.

Tin hende muhé un saya ku blusa ku riba dje un kalke ku manga largu. Riba skouder e ta bisti un shal i riba kabes e duki mara. Na su garganta un kadena ku krus i na pia sandalia.

Lensu di kabes, un herensia afrikano eksitante

Prenda Filingrana

Den seno nan di élite nan tabata bisti paña adaptá na e klima. Mayoria biaha blanku. Esnan mas pudiente tabata bisti paña di satin, seda i felpa. Nan tabata usa krùlnan falsu i flèktu for di Fransia. E hende muhénan tabata bisti sombré ku flor, fruta òf para drecha ku sinta. Nan tabata gusta bisti prenda di oro.

Un prenda hopi konosí tabata filingrana di Kòrsou, un trabou artístiko di drachi plata i oro di flèktu den otro. Nan tabata traha e drachinan di oro ku un otro metal (por ehèmpel koper), pa nan smèlt nan huntu den un malchi chikitu. Den un mashin spesial nan tabata traha drachi  fini di klòmpi di oro. Nan tabata usa un tang ku sker chikitu pa traha formanan dekorativo ku nan tabata pega na otro. E resultado ta prendanan di garganta, man, hanger di kadena, broche i renchi orea. E forma di kurason tabata esun mas konosí, i nan tabata yam’e kurason di Kòrsou. E tabata e prenda mas kostoso produsí na Kòrsou. E tabata solamente destiná pa muhénan di famianan mas pudiente. Algun eksepshon tabata e yayanan di famianan riku ku despues di aña di servisio fiel tabata risibí esaki komo regalo. Despues di tempu e prenda aki a bira un símbolo di status i kasi tur pareha hende hòmber tabata kumpra un pa regalá nan pareha.

Leave a comment