Skip to content Skip to footer

Kuminda krioyo

EE promé plato di Kòrsou tabata di Indjannan. Nan tabata kome piska òf karni i prinsipalmente maishi ku bonchi. Banda di esei tambe fruta, batata dushi, pinda, kakou i yuka. Nan tabata stom e kuminda, òf roster (barbacoa, barbeque) òf hasa seku riba un plachi di klei (comal).  E karni ku nan tabata kome tabata prinsipalmente, kalakuna, patu i yuana.

E Spañónan a bini ku porko i algun fruta nobo manera mango, papaya, awakati, koko, guyaba, anasa, lamunchi ku oleifi. Nan a trese sason manera orégano, yerba di hole ku Indjan nan a bai usa pa sasoná kuminda. E Indjan a sera konosí ku kuminda di e Spañónan.

Ku yegada di Oropeonan, kustumbernan di salga karni a ser introdusí. E nabegantenan tabata salgá karni ku piska pa e keda largu tempu konservá. E Hulandesnan di West Indische Compagnie a bini ku keshi, spèki i otro tipo di bonchi manera kapuseiner.

Temporada di sklabitut. Afrikanonan sklabisá a bini ku e banana di Afrika. Nan a bini tambe ku lele pa kushiná e bonchi.

Afrikanonan sklabisá tabata haña kuminda 12or di merdia pa hinter dia, ku tabata funchi, piska òf karni salu. E plato prinsipal na Kòrsou ta funchi ku ta un kuminda ku ta originalmente di Afrika. Funchi komo plato a yega Kòrsou ku e promé afrikanonan di regionnan Afrika unda awe e paisnan Congo i Angola ta situá.

Na Kòrsou ta traha funchi di maishi chikitu i ta kome esaki ku karni òf piska. Mainta tambe sa kome funchi ku warapa (stropi) di tamarein òf papa di maishi chikitu. Tambe sa kombiná funchi ku kalmèki i suku òf lechi karné ku funchi i kané.

Komo ku e batata yuka no por krese riba nos islanan, a remplasá e base di e alimento aki den promé instante ku maishi rabu (maishi chikí) i despues ku maishi hel òf blanku. Platonan similar na funchi bo ta haña na praktikamente tur isla di Karibe. Na Jamaica i Islanan Virgen ta yama e alimentu aki “Fufú”, miéntras ku na Monserrat, Grenada i Trinidad i Tobago tin un plato similar ku e nòmber “Fungee”, ku ta konsistí di maishi hel bruá ku fruta di yambo. E plato aki ta konosí den e regionnan di Congo komo “Funge Bombo”.  

Na Kòrsou ta kome funchi ku karni stoba òf piska. Tambe ta kome hopi karni ku piska salga.  E Afrikanonan sklabisá a siña kome durante periodo di sklabitut loke tabata na nan alkanse i mas ekonómiko, makrel ku bakiou salga. Piska salga tabata un fuente di proteina pa nan.

Pa mas informashon check página di Facebook Kustumber, kuminda i kreensha di origen Afrikano na Kòrsou, Boneiru i Aruba 

E poblashon pober di Kòrsou tabata kome mainta kòfi ku repa, mèrdia funchi ku karni i anochi tutu. E kuminda prinsipal di e poblashon pober i Afrikanonan sklabisá tabata funchi ku bonchi ku karni òf piska. Nan tabata husa karni sa di baka òf kabritu. Esun mas pober tabata kome piska komo ku esaki tabata mas fásil pa yega na dje. Yuana tabata un kos dushi. Bonchi, yambo ku kadushi tabata e berdura nan mas tantu kome.

Temporada ku hudiunan Sefardí a yega Kòrsou den siglo 17 nan a introdusí kombinashon nan diferente di plato, por ehèmpel kuminda zir ku dushi huntu ku otro,manera preimu, alkapara, rasenchi, oleifi. E katibunan di kas a siña trahando den kushina di shon e sistema diferente di kushina.

Despues di abolishon di sklabitut nan a manda buska Asiátikonan pa bini traha den Karibe. Nan a trese berduranan manera spinazi ku kròpsla. Prinsipalmente den siglo 20 tabata tin Chines ku Indones ku a bin establesé nan mes na Kòrsou. Chinesnan a kuminsá habri nan restorantnan.

Ku binida di Shell e ekonomia a kambia i tur e diferente gruponan étniko a a introdusí nan mes platonan. Hulandesnan a bini ku batata i komo ekonomia tabata drai bon, por a importá batata. Gruponan di Karibe Ingles tabata traha nan mes pan i yuka.

Durante di dos guera mundial un grupo supstansial di Indones a bini establesé nan mes na Kòrsou, prinsipalmente di Marine. Nan a introdusí platonan manera nasi goreng, bami goreng ku saté.

Platonan konosí na Kòrsou di kushina tradishonal ta: 

Pia stinki

Un wesu di kabritu den shinishi di karbon, lor’e den un duki i der’é bou tera. E ta keda bou di tera te ora e kuminsá putri, e ora ei nan ta has’e 

Sòpi di kadushi

Esaki ta un sòpi manera leim traha di e káktus kadushi huntu ku karni sa.

Yambo

Esaki ta un sòpi manera leim traha di e berdura yambo. Den un yambo riku bo ta topa kabaron, karkó, rabu, karnisa i piska. Ta kome yambo semper ku funchi.

Tutu

Bonchi huntu ku maishi, suku, lechi koko. Nan ta yama tutu e kuminda di hende pober. Den transkurso di tempu e a bira mas refiná ku entre otro lechi koko i keshi i manteka. 

Stobá

Ta un manera di kushiná kaminda ta tuma tempu pa kushiná e karni (galiña, karni kabritu òf baka) òf berdura manera sneibonchi, kolo, kònkòmber chikí . Hopi biaha ta kome kuminda stoba ku funchi òf ku aros. 

Ayaka

Un variashon di esun di Venezuela. Blachi banana ku hariña di funchi, suku, salu, keshi, manteka i lechi. Ku komo reyeno galiña, alkapara, rasenchi, preimu, oleifi, piccalilly, ham, sèlder, pitiseli ku ougùrk. Tur huntu lora den blachi banana. 

Mondongo

Un sòpi prepará ku tripa di baka òf kabritu. Despues di limpia e mondongo bon ku lamunchi nan ta kushin’é. E sòpi ta wòrdu prepará fin di aña preferiblemente.  Ku yuka, maishi, pampuna, batata, batata dushi. 

Karni di kabritu

Ta konosí pa fiestanan di Santa komunion i otro fiesta di famia. Nan ta kushiná kabritu sistema di stoba òf komo sòpi. 

Bolo pretu

Un di e spesialidatnan pa fiesta na Kòrsou ta bolo pretu. Ta trata un bolo di frutanan seku manera preimu, dadel, rasenchi, figo, almendra. Ta laga e frutanan keda para den un sous traha di stropi, suku brùin, bebida stèrki (sherry) ku speserei manera kané, netumuskat, klabu i peper. E dia di hink’e den fòrnu ta agregá manteka, suku, webu i hariña. E ta un bolo konosí den Karibe kaminda nan ta yam’e : black cake. 

Kos dushi

Di fruta manera koko, preimu i nechinan manera pinda, kashupete i tambe lechi ta traha diferente diferente kos dushi. E kos dushinan aki ta parti na fiesta di batisamentu, kasamentu i risibimentu. Nan ta drecha e mesa di e okashon konserní ku bolo i skalchi ku diferente kos dushi riba dje. 

Pa mas informashon lesa: Sambumbu

Leave a comment