Herensia kultural ta tur kos material i no-material ku un pueblo a krea den pasado. Ta trata di entre otro edifiosio bieu, historia, idioma, literatura i arte . Herensia kultural ta entre otro nan manera di kushiná, traha kas, idioma, baile, muzik i religion. Tin artefakto di hopi aña òf siglo pasa. Dokumentu i buki bieu di balor, potrèt i monumento. Herensia kultural por ta no-material, kual ta kerensia, kantika, kuenta, ideanan i sistema di papia etc.
Herensia kultural material ta lokual ku por mishi kuné. Por ehèmpel un monumento, un vestuario òf un objeto ku bo ta mira den museo. Bo por warda tur esaki. Herensia kultural no-material si no ta algu ku bo por mishi kuné. Por ehèmpel un kantika, kuenta, kustumbernan bieu, un manera di kushiná. Maske ku bo no por warda e herensia kultural -no material , sí bo por warda su konosementu ku potrèt, grabashon audio òf audiovisual.
Dikon herensia kultural ta importante?
Herensia kultural ta mustra nos, e orígen di nos pueblo. E ta hasi bo konsiente di e sabiduria di nos grandinan i kon nan tabata biba i pensa ántes . Mas bo sa di e sabidoria di nos grandinan, mas apresio bo ta haña pa bo propio historia i kultura. Tambe bo ta kompronde ken bo pueblo ta i dikon nan ta komportá un sierto manera. Pa e motibunan aki herensia kultural ta importante den formashon di bo identidat, komo suidadano di bo pais.
