Skip to content Skip to footer

Sklabitut i West Indische Compagnie (WIC)

WWest Indische Compagnie tabata un kompania ku a haña monopolio di Gobièrnu Hulandes pa hasi komersio den India Oksidental, kolonisá paisnan, hiba guera i sera pas den regionnan na nòmber di Hulanda i pa Hulanda. E poder di e kompania aki tabata masha grandi.  Johan van Walbeeck i Pierre Legrand a apoderá di Kòrsou na nòmber di West Indische Compagnie. Nan tabata tin mester di obrero i nan a dirigí nan mes riba kontinente Afrikano.  Afrika mes tabata konosé e sistema di sklabitut. E prizonero nan di guera tabata bira katibu dje pueblo ku a konkistá nan. Pero tòg e sistema tabata diferensiá di esun ku nos a bin siña konosé den siglo 16 te ku siglo 19 den e kontinente Merikano. Tribunan ku tabata hopi pasífiko promé ku e benta na gran eskala, pero despues tabata wòrdu kurashá pa hiba gueranan.

West-Indische Compagnie

Na 1642 Peter Stuyvesant a bira direktor di Kòrsou. Stuyvesant a goberná Kòrsou te ku 1664. Stuyvesant su plan tabata ta pa hasi Kòrsou un base pa negoshi di katibu. Entre 1685 i 1713 e komèrsio akí, kondusí pa West Indische Compagnie, a yega su punto kulminante aki na Kòrsou. WIC tabata tin un monopolio masha bon protehá. Barku Hulandes tabata buska Afrikano na kosta di Afrika i trese Kòrsou. Tabata bende Afrikanonan ku kolonia na Merka, ku islanan Ingles i kolonianan Franses . Tambe tabata bende Afrikanonan ku intermediario/ asentistanan Spañó, ku ta esun ku ta bende e Afrikano sklabisá ku kolonianan Spañó segun su kontrakt. WIC tabata trese 1.500 pa 2.000 Afrikano sklabisá kada biaha i 8.000 pa aña. Residentenan di Kòrsou no tabata permití pa partisipá den e negoshi di katibu, solamente WIC via su direktornan. Eksportashon di katibu for di Afrika a keda monopolio di WIC.

Transporte di Afrikanonan

E transporte di e Afrikanonan pa Karibe den barkunan tabata un situashon horibel. E barkunan tabata wòrdu yena ku Afrikano, mara ku nan pia na otro. Tabata tin diferente dek riba otro, e espasio entre dos persona tabata 1 meter di altura, 1½ meter di largura i ½ meter di hanchura. Tur dia nan tabata tin mag di bai kue airu riba dek. Hopi Afrikano tabata kometé suisidio. Otro tabata ninga di kome. Rebeldia tabata tuma lugá na bordo, pero mayoria tabata fayesé di malesanan manera sarampi i diarea. Sigur 15% tabata fayesé di e malesanan aki.

Ora un barku di Afrikano drenta haf tabata hinter un fiesta, un kumpradó desente tabata kumpra hinter un famia huntu. Mayoria kumpradó no tabata desente. Ora e Afrikanonan yega Kòrsou, nan tabata bai Zuurzak i un reserva na Groot st. Joris. Akinan e Afrikanonan mester a haña nan forsa bek, despues di e krusada riba laman, promé ku nan bende nan. Tanten ku e doño no bin buska e katibu, WIC tabata por a usa nan pa su mes trabounan. Entre 1639 i 1713 Kòrsou tabata funshoná komo depósito di Afikanonan skablisá. Aki bou tin un video ku informashon di e depósito.  

Parke Den Dunki

Nomber pa Afrikanonan sklabisá

Un Afrikano entre 15 pa 35 aña sin ningun defekto físiko tabata yama pieza de indio ku otro palabra merkansia.  Afrikanonan ku ta tin un òf otro defekto nan ta yama “mankaron”. Na Kòrsou e shonnan tabata kumpra basta mankaron, paso nan tabata mas barata. Un katibu por bira mankaron dor di falta un djente òf pa motibu di edat mas avansá. 

No tur Afrikano ku a yega Kòrsou tabata wòrdu bende, un kantidat limitá tabata keda patras i parsialmente bende na e shonnan di plantashi i negoshi. Un sierto kantidat tabata bira propiedat di WIC , ku nan tabata yama “landsslaven”. Nan tabata traha riba plantashon di WIC. Nan funshon tabata pa sòru pa kuminda di e katibu ku tabata keda temporalmente na Kòrsou. Promé ku nan wòrdu bende. Tabata un par di produkto di plantashon ku nan tabata eksportá manera dividivi, fruta i salu. 

E periodo ku Kòrsou a probechá mas di komersio di Afrikano sklabisá tabata entre 1660 i 1713. Agentenan di Afrikano sklabisá tabata kumpra entre 100 -1500 pareu i mesora nan tabata probechá tambe pa kumpra produktonan for di Oropa, importá for di Hulanda. Haf di Kòrsou tabata kontinuamente yen ku bapor di Cartagena i Puerto Bello. Tabata tin temporada ku tabata tin 2000 pa 4000 Afrikano temporalmente na Kòrsou pa bai otro isla i pais den serkania. Mayoria Afrikano sklabisá tabata e periodo aki di Guinea ku Angola.

Kapitan i nabegante tabata hasi negoshi ilegal i nan tambe tabata importá Afrikanonan den sekreto pa bende. Ta p’esei WIC a introdusí un lei ku tur katibu mester haña un marka. Tabata tin un heru spesial pa marka e katibu ku ta keda propiedat di kompania.

Despues di 1713 e trafikashon di katibu a kuminsá baha rápidamente ora ku Ingles, Franses i Suekonan a kita e monopolio aki for di man di Hulandesnan i ku ta bira posibel ku barkunan di otro nashon ta buska katibu direkto fo’i kosta Afrikano pa kolonianan di Nort i Sur Amérika. Pa aña 1743 e kantidat di 8.000 pa aña a baha te na 500-600 pa aña i na 1778 e delaster barku di katibu a yega Kòrsou. Na 1814 Hulanda ta prohibí negoshi di katibu i na 1821 tur importashon di katibu den su kolonianan na West Indie. Por lesa mas informashon riba e link nan aki bou.

De verovering van Curaçao door de WIC en de komst van de Hollanders

De slavenhandel en slavernij