RRebeldia kontra e situashon di sklabitut a manifestá su mes na diferente manera. Hòrtamentu di propiedat di shon, traha poko poko na un manera kamuflá komo bòikòt, suisidio etc. Ta konosí ku esnan sklabisá a kometé suisidio na un baranka na Hato na nortkant dor di bula na laman, pero tin algun kaso ku no ta konosí kon a katibunan a disparsé. Na 1750 gobernantenan ta reklamá ku 75 katibu a disparsé.
Formanan mas aktivo tabata huida òf lantamentu kontra di e shonnan. Na 1750 tabata tin un rebeldia kontra di e trato inhumano, pero e rebeldia no tabata eksitoso. E rebeldia aki a keda solamente na plantashi Hato. Mas o ménos 100 persona sklabisá a ataká e plantashi. Nan a asesiná 59 persona sklabisá i sende nan kas na kandela. Di esnan sklabisá ku a rebeldiá, algun di nan a kometé suisidio. Nan a kapturá 52 persona sklabisá i 39 nan a bende i manda pa eksterior. Remarkabel ta ku esnan sklabisá ku a rebeldiá a yega resientemente for di Afrika.
Esnan sklabisá ku a tende di e revolushon liber di Fransia tabata pensa ku gobernantenan nobo na Hulanda si ke duna nan, nan libertat. Pero ku ta gobièrnu lokal huntu ku e shonnan tabata ninga di anunsiá e lei.
Na Haiti na 1793 e rebeldia di esnan sklabisá a resultá den nan libertat i esaki a yega na orea di esnan sklabisá na Kòrsou. E rebelion na Haiti enkabesá pa Toussaint L’Ouverture a bira konosí masha lihéٞ mes. E viktoria di esnan sklabisá na Haiti a hasi un gran impakto riba esnan sklabisá na Kòrsou. Nan tabata na altura di e prinsipionan di revolushon Franses di igualdat, libertat i fraternidat. Na Coro Venezuela tambe un rebelion a lanta na 1795 bou di guia di un katibu Kurasoleño José Caridad Gonzales i un katibu ku a hui ku yama Jose Leonardo Chirino.
Tula, Louis Mercier, Bastiaan Carpata i Pedro Wacao, katibunan di kunuku a uni i lanta kontra di nan doño na 1795. E rebelion mas grandi i importante den historia di Kòrsou. Na e rebelion aki personanan sklabisá di diferente plantashi di Banda Bou a partisipá. E rebeldia a kuminsá na plantashi Kenepa. Dia bèl a bati riba 17 di ougùstùs 1795 esnan sklabisá no a bai traha. Bou di guia di Tula nan a bai serka serka doño di plantashi di Kenepa, van Uytrecht i eksihí nan libertat. Nan a liberá algun persona sklabisá ku tabata enkarselá i despues sigui pa plantashi st. Cruz. Einan tabata bou di guia di Bastiaan Carpata. Aki nan a uni ku persona sklabisá di st. Cruz. Diferente persona sklabisá a bai plantashi di st. Cruz pa bebe awa di huramentu. Riba 18 di ougùstùs esnan sklabisá a bai di st. Cruz pa plantashi Porto Marie, kual a bira e kuartel sentral pa esnan sklabisá . Un di e otro lidernan Louis Mercier a keda atras pa por konvensé e otro katibunan pa djòin e lucha. Tambe pa konkistá fòrti di st. Cruz i Kenepa pa yega na arma ku munishon. Louis Mercier a bai ku komandante van der Grijp di Santa Cruz i Tieleman di Kenepa komo prizonero. Tur shon a hui bai Punda i a laga e plantashinan den man di esnan sklabisá .
Promé konfrontashon
Na 19 di ougùstùs tabata tin e promé konfrontashon den saliñanan di st. Maria ku ehérsito. Esaki tabata un viktoria pa e esnan sklabisá. Gobièrnu a manda seguidamente un ehérsito mas grandi pa nan. Anteriormente e pastor Schink a purba di konvensé esnan sklabisá pa bai bek plantashi. Ora esnan sklabisá no kier a entregá nan a ataká dia 20 di ougùstùs Porto Marie. Diferente persona sklabisá a fayesé i 12 a bira prisionero. Nan hui bai Fontein kaminda Louis Mercier ku un 600 kombatiente tabata warda. E katibunan di Hato ku Grote Berg tambe a djòin.
Táktika di dividí i reina
Despues nan a bini ku táktika di dividí i reina. Tur persona sklabisá a haña pordon ménos e lidernan. Dia 25 di ougùstùs tabata tin un lucha entre 2000 persona sklabisá i e ehérsito di kapital Westerholt. Nan a keda lucha 5 dia largu, pero despues nan a haña nan ta hui, lagando diferente persona sklabisá heridá i morto atras. Tur persona sklabisá kapturá ku harma den nan posishon, nan a asesiná. Pa motibu di e lucha aki nan ta yama e punta di e seru di Fontein, Ser’i Neger. Hopi persona sklabisá a bini pa pidi van Westerholt pordon. E lidernan a keda nan so para i nan a hui den mondi. Van Westerholt a laga nan venená tur pos i maishi pa obligá nan pa entregá. Despues di 14 di sèptèmber tur persona sklabisá a bai bek plantashi. Riba 27 di ougùstùs nan a partisipá e búskeda di e lidernan i nan lo a otorgá un premio di 500 florin ku pa e tempu ei tabata hopi sèn. Tur persona sklabisá ku no a partisipá na e rebeldia lo a rekobrá nan libertat. Esaki a pone ku esnan sklabisá a reda nan lidernan. Den luna di sèptèmber nan a kapturá e lidernan. Nan a funshoná komo ehèmpel pa otro persona sklabisá , pa spanta nan. E lidernan a haña a straf mas pisa. Nan a kologá Tula na un krus i mar’e na un wil pa seguidamente kap su kabes afó.
Nan a tira su kurpa den laman i pega su kabes na un staka riba plenchi di Gobernador. Nan total nan a ehekutá 29 katibu, 3 a haña straf dor di maltrato físiko i 10 eks-katibu i 7 katibu nan a manda den eksterior. Pa mas informashon por bai e linknan aki bou.
Canon van Curaçao | 6. Slavernijverzet – Canon van Curaçao (canoncuracao.cw)
Despues di e lucha pa libertat Gobièrnu a kuminsá trata personanan sklabisá ménos malu. Nan a kambia reglanan e orarionan di trabou pa ménos ora, nan tabata risibí mas funchi, nan a kambia e reglanan tokante gravedat di strafnan. Tabata tin diferente regla, pero masha tiki shon tabata tene nan mes na nan.
Bou di preshon di emansipashon ku a tuma lugá na kolonianan Ingles ku Franses den añanan 1833 ku 1848, gobièrnu tambe mester a kuminsá reflehá tokante abolishon di sklabitut. Na aña 1863 sklabitut ta ser abolí.
Un kantika ku esnan sklabisá tabata kanta ora di abolishon di sklabitut tabata:
Bam pidi Dios na rudia abao
Cu su santu debocion
Awor nos ta liber di tur shon
Liber di tur nacion
Catibu di rei
Un otro kantika tabata :
djuku Kaiman, djuku eeh- djuku kaiman
ai shon m’a kaba na bon
ai shon m’a kaba na pas
kaiman djuku eh- djuku kaiman
shon m’a kaba na bon
ai djaka laba tayo
ai djaka buta mesa
djaka lo bati kama
kaiman djuku- djuku kaiman
Djuku krokodel, ai shon, a bai bon ku mi, mi ta biba na pas, laga djakanan laba kos, laga djaka drecha mesa, laga djaka bati kama, ami ta biba na pas.
