Bondia yufrou, bondia muchanan,
Awe mi ta bai tene un spreekbeurt di Kultura, dor ku e ana aki ta ana di Kultura.
Prome mi ke konta boso kiko ta kultura.
Kultura ta e e manera ku hende ta biba ku otro, ku su bisendario i naturalesa .
Tur pais tin nan mes kultura
Asina Korsou tin su kultura
Chines tin nan mes kultura
Hulandes tin nan mes kultura
I tur otro pais na mundu tambe tin nan mes kultura.
Tin un parti di kultura ku bo por mira ront di nos I un parti ku bo no por mira fasil. E parti ku nos ta mira di nos kultura ta por ehempel:
- Edifisio bieu ku nos ta yama monumento
Asina nos tin nos kas di kunuku i hopi landhuis bunita na Korsou
- Artikulo bieu, manera heru di strika di kerosin, washi pa laba pana
- Nos kuminda krioyo manera funchi, tutu, yambo ku bonchi
E parti di kultura ku nos no ta mira ta:
- Idioma
Manera nos Papiamentu ku ta un kombinashon di idioma Afrikano, Portuges, Spano i Hulandes. Nos por tende nos idioma ku nos orea si.
- Kerensia,
Esaki ta pensamentu nan di antes. Asina tin hopi hende ku gusta sensia kas fin di ana. Nan ta kere ku esaki ta duna nan suerte. Esaki ta un kerensia.
- Dichonan I proverbio
Nos tin manera di papia pa splika un situashon
Asina bo por bisa e proverbio: mi a hari mi barika yen. Esaki no ta nifika ku bo barika ta yen di kuminda pero ku bo a hari masha tantu mes. Tambe tin e proverbio ku ta bisa Bati Bleki. Esaki tampoko no ta nifika ku bo ta bati un bleki di berdat. Pero ku bo ta hasi redu
- Norma i Balor
Esakinan ta tur regla di respet di loke un hende tin mag di hasi of no mag di hasi.
Asina nos no por yama hende grandi BO. Nos ta bisa mai ku pai, mama, tata of tanchi ku tio i nos no ta yama nan BO
Arte tambe ta parti di kultura ku nos por mira ront di nos . Ku arte hende ta mustra nan emoshon i pensamentu na un manera kreativo. Nos tin diferente forma di arte:
- Baile, manera nos baile folklornan, manera wals ku mazurka
- Musika, nos muzik di karnaval, tumba. Pero tambe muzik di Seu i hopi otro mas
- Arte Visual, ku ta pintura i eskultura
- Artesania, kosnan traha di obra di man, por ehempel produktonan traha di klei of skalchi di kalbas.
- Teatro, manera komedia
Kultura ta pasa di hende grandi pa mucha. Asina nos por sina hopi di nos welanan i tanwelanan di nos kultura.
Ta bon pa bo konose bo kultura, paso kultura ta parti importante di bo mes i bo pais. Mas bo konose bo kultura mas bo ta stima bo mes i bo pais.
Danki ku boso a skucha mi