Skip to content Skip to footer

Kustumbernan rònt di morto

KKustumbernan rònt di morto ta un kombinashon di elemento di religion katóliko ku kultura Afrikano. Afrikanonan tin e pensamentu, ku e defuntu lo reuní ku su famianan defuntu. Meskos ku religion katóliko ta kere den e bida despues di morto.

  • Famia ku amigunan ta sinta rònt di esun ku ta bai muri pa skucha su último deseo. Mester kumpli ku e deseo di e defuntu, si no su alma lo no por sosegá na pas i lo keda molostiá esnan na bida. 
  • Ora morto kai mester tapa tur spil den kas ku paña blanku pa bo no mira kara di e defuntu den dje. Tur hende ku bini mester hinka feneta den mortaha di e defuntu pa e defuntu laga nan na pas. 
  • Famianan mester sende kuater bela di morto. Kada bes ta paga esnan sende pa bolbe sende otro. 
  • E famianan femenino di e defuntu ta sinta den kamber bisti na blanku, kabes mara ku lensu blanku i pida yerba di hole tras di nan orea.  
  • Unabes e persona fayesé, nan ta yama e labadó di morto pa drecha e defuntu. Asina e defuntu sali kas, nan ta dueilá kas ku lisòl òf kriolin. Mester a mòp e kas pura, pa ora e spiritu bini bek e no rekonosé holó di su kas 
  • Ántes e entiero tabata tuma lugá e siguiente dia, paso nan no tabata tin frizer pa warda e kurpa aden manera awendia. Ta dal un rònchi rònt di e kas ora ta bai ku e defuntu pa e defuntu pèrdè kaminda i no regresá. 
  • Ántes mester tin yoradó di morto. Durante e yoramentu nan ta pidi e defuntu pa kumindá otro defuntunan ku nan konosé. Nan ta pidi defuntu di konta e otro defuntunan kon ta ku e famianan. 
  • Promé ku sera kaha, nan ta kue midi di e famianan mas serka i hinka e hilu den e kaha. 
  • Esaki pa evitá kue defuntu ta regresá pa buska e famianan pa bai ku n’e. Pa mesun motibu nan sa hinka feneta den e paña di e defuntu.

Nan ta karga e defuntu ku pia parti dilanti direkshon pa Santana. Nan ta kana den fila di hende hòmber tras di e waya di morto pa yega Santana.

  • Despues di entiero mester a tene resamentu na kas i ta bai kas di e defuntu pa laba man.  
  • Pa 8 dia despues di entiero ta hasi orashon na kas di defuntu pa e defuntu por sosegá na pas.  Ta keda sende bela durante 8 dia (tin ora 40 dia) komo konsuelo pa e defuntu. Nan ta resa rosario banda di un altar ku krus i bela. Ora tur kos kaba, nan ta rùim òp e altar. E di 8 dia tabata tin e ritual di resamentu despues ku hende muri. Riba e dia di klousura e orashon ta dura mas largu ku anterior. Tur hende ta keda para, pero nan no ta para den kaminda di salida òf porta di e kas pa no stroba e defuntu sali. Tin ora e kibramentu di altar ta bai literalmente komo kibra e altar i kore ku e spiritu. 
  • Pa sigurá un entiero respetuoso, a lanta sosiedat komo fondo di entiero. Nan ta yama nan Seter i na Punda societeit. Nan tabata paga nan kontribushon fiel.
  • Ora e hende muri ta pasa ku waya di morto dilanti di e kas. Anto ora e waha di morto kaba di pasa ta basha un hèmber di awa su tras. 
  • Si spiritu  di un defuntu ta molostiá bo, bo tin ku hum’e ku kakabú, sapatu bieu, tayer i suafel, kachu di baka tambe ta bon. Asina bo mira un spiritu, bo tin ku gloria bo kurpa, bira bo paña robes pa drechi i koba su mama. 

Un kantika di ocho dia kaminda e kantante ta pasa serka hende ku un sombra pa pidi un kontribushon ta lo siguiente:

Zamana kitoki ai toki ai di kitoki 
Zamana kitoki ai toki ai toki 
Zamana kitoki ai ‘na mi un limosna 
Zamana kitoki toki di kitoki 
Zamana kitoki ai toki a subi palu 
Zamana kitoki ai “na mi un limosna” 
Zamana kitoki toki di kitoki 

Entiero di Katibunan

Ora un katibu muri na un plantashon, den mayoria kaso e doño di plantashi tabata duna pèrmit pa esnan yegá di esun ku a fayesé, hib’é dera na sitio alehá for di e plantashon. Ounke mayoria doño di plantashon tabatin nan lugá pa dera nan famia òf otronan yega na e famia, tòg tabata prohibí pa dera katibu den mesun santana òf sitio ku doñonan di plantashi. Ora un katibu muri, esnan yegá n’e ta karg’é bou di kanto i hib’e na un sitio alehá for di e plantashi. Einan tabata tuma lugá algun ritual i tabata hinka e kurpa den un buraku ku a koba den tera i bou di kanto i toka di tambú tabata efektuá e ritonan funeral. Tabata un kustumber pa dera katibunan di e kultura “Mande” ku nan kabes den direkshon ost. Riba e graf den tera di nan di nan defuntunan ta planta un brasa di palu di sia. Tabata usa palu di sia pasobra ta konosí ku hinkando un brasa di e palu aki den tera, e ta krese i bira un palu grandi ku ta duna masha hopi sombra. Otro kustumber tabata esun di dera katibunan ku kosnan di laman, manera piedra, koral i kokolishi.

Pa mas informashon por lesa:

Rito i kustumbernan relashoná ku morto den tempu di katibu

Sambumbu