Skip to content Skip to footer

Wiri

Wiri ta un pida heru ku lomba bòl i e parti ariba tin algun skref. Ta trata normalmente un pipa ku nan a kòrta na mitar i hinka skref aden. E grandura ta varia di 20 pa 30 cm.

Chapi

Pa siglo kaba ta usa e partinan di metal di hèrmènt di kunuku komo instrumènt di muzik. Na Kòrsou ketu bai ta tende e zonido skèrpi i penetrante di e chapi di metal, durante fiestanan di seú i den muzik di tambú. Oropeonan a trese e chapi Kòrsou. Na Afrika a konosé chapi di heru bati ku palu kòrtiku. Desendientenan Afrikano a traha den kunuku ku e chapi akí pa bòltu tera i kita yerba shimaron kuné. Pero asina e bira stòmpi, gasta, frusa e hèrmènt akí ta haña un funshon komo instrumènt akústiko ku ta kompañá tambú. Ta kita su man i ta pone e chapi, si ta nobo, den kandela pa saka e tenshon for di e heru i asina tambe e tononan haltu demasiado penetrante. E chapi a bira asina un instrumènt musikal.

Bari

Un barí di palu di span na un banda ku kueru di karné òf di kabritu. Ta karg’é na garganta. Ku un pida palu wantá na e faha ta tene e tambú skùin di moda ku por kana tok’é. Ora seú yega kas e tokadó di barí ta kita e bari for di su garganta i ta kai sinta toka.

Agan

Agan òf Heru ta un instrumento musikal ku tabata wòrdu usa ántes pa kompaña e instrumentonan tambú ku kachu durante fiestanan di kosecha. 

E instrumento tabata traha di un djente di plu kibrá i su forma tabata brutu i e tabata pisa. Pa toka e agan e tokadó tabata tene e agan na e punta, di moda ku e parti rondó tabata keda drumi riba su brasa. E habri den su largura tabata keda ariba. Pa protehé su kueru di brasa e tokadó tabata bisti na su pòls un banchi traha di plachi heru, yama barba . Riba e banchi aki e agan tabata sosegá durante tokamentu. Ku un pida bara di heru yama manga, e tabata dal’é parti rondó dje agan den ritmo. E agan ta wòrdu toka tambe ku dos pida heru (agan di tres pida) òf klabu grandi.

Benta

E benta ta un instrumento traha di un bog di taki karawara. E bog ta sten riba e rudia di e músiko.  E otro banda, e músiko ta tene dilanti su kara ku e kuèrdè ta yega nèt na su boka ku ta habri. Einan e ta dal e palu. Ta toka benta den muzik di Zumbi. 

Potrèt Archivo Nashonal

Kachu

E kachu ta di toro. Ta toka semper dos òf mas kachu. Un ta supla ariba, ku otro palabra e ta floria i e otro (nan) ) ta respondé. Nan ta dominá e zonido di e kachu dor di sera e parti habri ku man. Kachu ta wòrdu usa pa músika di seú. Ántes tabata usa kachu pa partisipá ora un hende a fayesé. Pa esaki nan tabata usa un tono spesial. E supladó di kachu tabata para riba un seru pa supla e kachu, asta mardugá. Asta e nòmber di defuntu i remarkenan e supladó di kachu tabata partisipá. Despues di tempu radio, e kustumber aki a disparsé.

Morti Geertruida

Triangel

Triangel, Triano ta un speilu di heru òf un bara di heru nan ta bati e heru den un drihuk. Ariba e ta keda habri i e ta kologá na un kabuya den mas di e músiko. Miéntras ku e músiko ta tek e parti di paden ku un pin di heru

Bastel 

Den un tobo di awa nan ta  bòltu kalbas i toka riba esaki ku nan dedenan. Nan mester ta kalbas di hòfi. 

Ka’i Òrgel 

Banda di tambú e kai òrgel ta un di e instrumentonan mas popular na Kòrsou. For di Italia i Spaña i originalmente Alemania. Na Kòrsou nan a hinka zonidonan lokal den e muzik. 

Kaha di òrgel, kaha di músika òf kaha di piano a originá den komienso di siglo 19 na Inglatera. Djei el a pasa pa otro pais manera Spaña i spesialmente Italia. Nan ta pensa ku e kaha di òrgel ku nos konosé a bini for di Novara Italia. Tin indikashon ku e ta un invento Aleman. 

E promé kahanan ku a yega Kòrsou tabata di marka Italiano. Por ehèmpel e ka’i òrgel úniko. Tabata toka e kaha aki ora tabatin fiesta na kueba di Hato. Ta bisá ku e kaha tin masoménos 110 aña. Mayoria di e kahanan a yega e tempu ei via Venezuela kaminda hopi migrante Italiano tabata biba. 

Tempu ka’i òrgel a drenta Kòrsou, na final di siglo 19. Ritmonan manera wals, mazurka, polka, i foks tabata na moda. Ta p’esei tambe nan a bira parti di ka’i òrgel. 

Ka’i òrgel a bira popular den nos komunidat. Promé ku yegada di ka’i òrgel e muzik ku tabata dominá mas den bario i na kunuku tabata muzik di zumbi, tambú, seú, i tabata usa instrumèntnan manera bastèl, tambú, kachu, benta, karkó i kuarta. 

Kaha di músika a drenta promé den e salonnan elegante di hende ku moda, kaminda e hendenan tabata kustumbrá ku tokamentu di piano i muzik di kuèrdè manera kuarta i fió. Despues el a plama bai den tur gremio den Otrabanda i Punda i a yega te kunuku. E zonido atraktivo nobo akí a agradá hende di tur nivel i gremio sosial rònt Kòrsou. 

E tempu ei tabatin hende ku tabata hür ka’i òrgel. Nan tabata transportá e ka’i òrgel aki riba garoshi te ku añanan trinta. Despues nan tabata transport’é riba trùk pa bai te Banda bou. 

Nos pueblo a enrikesé e instrumènt aki ku riba su mes tabata representá un orkesta kompletu, ku un instrumènt pa kompañé, ku ta wiri. Ku wiri nos hendenan a ekspresá e gran kapasidat rítmiko ku nos tin. Wiri a keda e instrumènt pa kompañá ka’i òrgel.