Selebrashon di Dia di San Antonio
San Antonio de Padua ta un di e santunan mas konosí na Kòrsou. E tabata un santu di religion katóliko masha popular, komo ku e tabata hopi yega na pueblo . Na kasi tur misa bo ta topa un busto di San Antonio.
E leli ku San Antonio ta tene den su man ta un símbolo di puresa. Den su brasa e ta karga un yu riba un buki. E buki aki ta beibel. E yu ku ta sinta òf para riba e beibel ta propagá palabra di Dios. Den religion popular nan ta bisa ku e yu den su brasa, ta di dje, ta un yu ku el pèrdè i haña bek. Aki pueblo a interpretá e presensia di e yu na su mes manera.
Dia 13 di yüni ta selebrá San Antoni ku e seremonia ku yama Lele Toni. E yu Hesus den su brasa nan ta yama su yu. Antonio ta gusta fiesta. Riba su altar ta pone bòter di bibida. Nan ta balia dilanti su altar. Nan ta yam’e Toni. Nan ta straf Toni ora e no kumpli ku un persona su deseo. Nan ta pone manera mucha mala mucha ku kara na muraya òf hinka kabes abou den un tobo ku awa. Nan ta zundra Toni i kanta Toni na bari.
For di dia 10,11 ku 12 di yüni tin un triduo ku ta tres dia di orashon ku rosario. Riba e dia di e fiesta nan ta kologá fruta i otro kuminda pa ku sa ofresé na San Antonio. Segun tempu ta bai dekorashon na fiesta di San Antonio a bira mas i mas bunita. E fruta i otro kuminda ku sa ofresé na San Antonio ta: koko, mespel, patia, bakoba, frut’i pan, pan chikí in bendishoná i tambe kos dushi.
Pa mas informashon, check e website: Sambumbu
Promé ku fiesta kuminsá tur hende ta pone un tayo ku papa di aros ku hopi kané, den un huki di kas. Doño di kas ta bisa ku Toni tin ku haña su pasaboka promé ku otro hende. Un doño di kas ta kumpli ku Toni pa Toni kumpli ku ne. Dilanti di e imágen di Toni tin ròm, bela blanku i un vas ku e leli di San Antonio ku yama “tuberose”. Muhénan sa forma nan saya na moda di kángaru i pidi: Toni laga plaka bin basha aki den. Asina nan ta keda balia, pidi lele Toni te mardugá.
Debotonan sa pidi Toni, kasamentu, trabou, plaka i asta kas pa biba aden. Esun ku logra e kas ta duna e kas nòmber di San Antonio. Tin deboto ta pidi Toni yu i ta primintí Toni ku e yu ta haña su nòmber.
Un kantika di Lele Toni:
San Antoni mi Toni mi Toni
San Antoni duna mi bo kachucha
San Antoni mi Toni mi Toni
San Antoni fia mi bo garoti
San Antoni mi Toni mi Toni
San Antoni yuda mi ku milagro
San Antoni mi Toni mi Toni
Dia di San Pedro
Dia 29 di yüni e pueblo di Westpunt ta selebrá e fiesta di nan parokia, San Pedro. E misa di Wèspùnt ta konstruí na aña 1849 i ta kalkulá ku fiesta di San Pedro a kuminsá e momento ku e a bario a haña su parokia. Tur aña nan ta tene un servisio di misa religioso. E manera ku nan ta selebrá ta kambia konstantemente.
San Pedro ta e disipel di Hesus. E tabata gana su pan di kada dia ku e fishi di piskamentu. Den pasado gran parti di famianan tabata biba di e fishi di piskamentu òf agrikultura. Esaki a pone ku habitante di Westpunt tabata gusta e santu masha, Por yama e fiesta di San Pedro e fiesta di piskadónan.
E promé bendishonamentu di laman a tuma lugá na 1879 dor di pastor. Probablemente pa pidi protekshon pa e piskadónan. Na 1899 e bendishonamentu di laman a tuma lugá na e baranka dilanti misa di San Pedro. Piskadónan a lanta un ramada einan pa pone e imágen di San Pedro. Preparashonnan tabata kuminsá for di dia di 25 di yüni. Durante e siman ei tur piskadó tabata uni pa hasi tur preparashon. Nan tabata bai piska for di mardugá pa nan por tei na tempu pa kologá a banderin.
E selebrashon tabata kuminsá ku un servisio na misa di Westpunt. Despues di esei tur hende ta kana den proseshon bai para kantu di laman kaminda pastor ta para di ariba bendishoná laman. Despues di esaki e selebrashon ta kuminsá na diferente kasnan di famia.Tin diferente forma paso tin pastor ta bai kantu di playa òf ta drenta den boto i bai bai riba laman pa bendishoná laman. Tin selebrashon ku tabata tuma lugá kantu di laman. Tabata tin bastante piskadó di Boka Samí ku tambe tabata partisipá na e selebrashon aki.
potrèt korant Extra
E piskadónan tabata tin e pensamentu ku ora bendishon laman, nan ta kue hopi piska.
Selebrashon di Dia di San Juan
San Juan tabata prekursor di Kristu. Nan ta konsider’é komo e santu di awa. Ela batisá Kristu ku awa di riu di Jordan. Den kerensia popular San Juan tin vários poder. E tin poder kurativo, poder pa drecha klima, poder pa fabor an amoroso. San Juan ta para tambe pa purifikashon pa medio di kandela. Un teoria ta ku selebrashon di San Juan den e.o. Karibe a kuminsá ku yegada di Afrikanonan den siglo 16. Afrikanonan tabata venerá e santu San Juan Guaricongo, e Dios di solo ku ta bini di region di Congo. E solo ta simbolisá kayente i purifikashon mediante su rayonan kayente. Den e kaso aki nan a remplasá solo pa kandela.
Ántes tabata tin e kustumber di kima sushi pa yama áwaseru. Kandela grandi ku ta purifiká kimando loke ta malu, kimando maldat. Ademas e kandela ta kima i produsí hopi huma ku ta bai den laira, influensiá nubianan i laga nan produsí hopi huma ku ta bai laira. Algu ku tabata di gran importansia pa e temporada di plantamentu ku ta sigui. E kustumber di San Juan ta relashoná ku temporada di plantamentu.
Dianan di santu tambe ta wòrdu selebrá. Aki tambe bo ta mira un kombinashon di religion katóliko i religion Afrikano. Dia 24 di yüni ta selebrá San Juan. Nan ta traha stapel di palu i prinsipalmente hende hòmber mester a bula kandela. Awendia tantu hende hòmber ku hende muhé ta bula kandela.
potrèt korant Extra
Nos konosé vários forma di selebrashon di san Juan. Kreyentenan di San Juan ta sende tres kandela i ta bula den fila. Tabata bula pa kambia suerte i pa pidi áwaseru. Ta bula tambe pa hasi deseo personal. Segun e persona ta bula e ta grita i e públiko na banda ta apoy’é E gritu di ora di bula ta: San Juan Pedro ha.
Despues ta keda selebrá huntu. Tabata bebe anis, biña, pinda herebé , fruta di kunuku, patia chukulati ku lèter. Den kunuku tabata toka benta, kachu ku heru na San Juan. E kanto tabata na idioma Gueni.
potrèt korant Extra
