MMúsika ku influensia Oropeo di siglo 19 ku influensianan di Spaña ku Vienna ta lo siguiente:
- Wals Antiano
- Mazurka
- Polka Antiano
- Quadrille
Wals Antiano
Wals Antiano a yega Kòrsou e di dos mitar di siglo 19 for di Oropa. Rònt 1865 e promé walsnan na Kòrsou a kuminsá ku e ritmo Oropeo. Te ku fin di 1900 nan tabata balia e wals mesun ritmo steif manera esun di Vienna. Despues di 20 aña a bini kambio den e ritmo ku patronchi.
Na aña 1900 kasi ningun wals tabata komponé mas ku ritmo di Oropa. Na Kòrsou nan a hinka algun aksènt rítmiko den e wals ku tabata nasementu di Wals Kurasoleño. Pareu ku esaki a baile tambe a kambia. Kompositornan di wals konosí tabata Joseph Corsen, Jacobo Conrad, Jacobo Palm, Paul de Lima. Gerrie Palm ku Rudolf Palm.
E orkestanan tabata di fio, flùit, klarinèt, bas, piano, harpa òf guitara i tin ora di tambú chikitu pa asentuá e ritmo.
Tabata baila wals dor di drai den rònchi. No tabata baila muchu lihé. E dama ta pone su man drechi na skouder di e her i ku su man robes e ta tene su saya. E her ta pone su man robes na hep banda drechi di e dama. Su pia robes tabata funshoná komo stir kontra di e bèl drechi di e dama pa dirigí e baile. Su man drechi e tabata pone na lomba di dama.
Mazurka Antiano
Mazurka na Kòrsou ta otro for di esun di eksterior. Rònt di mitar parti di siglo 19 mazurka a aparesé na Kòrsou. E ta un baile di tres/kuater tono ku aksènt riba e di dos konteo. Den baile di mazurka tin dos figura kual ta pia di kater ku valsante. Pia di kater ta krusa e pianan den forma di X durante e baile. Mazurka su orígen ta di Polonia, for di su introdukshon e tabata un tipo di músika masha gusta. Remarkabel ta ku mazurka no ta dje popular ei mas na Polonia, miéntras ku na Kòrsou el a dura mas ku 100 aña i ainda e ta wòrdu baila.
Kompositornan di mazurka konosí tabata Gerrie Palm, Chris Ulder, Jules Blasini , Jo Corsen Dòdò Palm, Coco Palm, Jantji Boskaljon i Rufo Wever.
Polka ku Quadrille
Polka ku Quadrille tabata ainda na moda fin di siglo 19. Polka ta un muzik hopi toká ku kai òrgel
Ku polka nan a duna un ritmo típiko di Kòrsou. Polka ta un baile di Bohemen. Historia ta bisa ku e pueblo di Bohemen tabata hopi musikal. Polka a originá den aña 1830 i despues di 5 aña e baile tabata konosí pa hinter Oropa. E nòmber polka ta derivá di “pulka” ku tin di aber ku e pasonan di e baile. E polka Antiano ta otro for di esun Oropeo, komo ku nos tin un melodia ku influensia mas lokal.
Quadrille si a keda meskos ku esun tradishonal di eksterior. Quadrille ta forma parti di baile di figura, ku a originá den siglo 18. Quadrille a originá di un kontrabaile Franses, ku ántes nan tabata yama “cotillon” (saya djabou) Músika quadrille no a ser komponé pa kompositornan lokal.
