FKomienso di febrüari 1922 e dos kompania grandinan di barku, Red D Line, kual S.E.L. Maduro tabata agente i Koninklijke West Indische Maildienst, representá pa sr. Menkman a partisipá na obreronan di haf ku pa motibu di e krísis ekonómiko nan lo baha e suèldu di ora di 50 sèn pa 40 sèn. Overtaim di 1fl pa ora a bira 77 sèn pa ora. Esaki tabata kontradiktorio na e echo ku ekonomia ku haf di Kòrsou tabata floresé i ku e kompanianan aki a logra di saka ganashi.
E wèlga di haf a kuminsá dia promé di aprel 1922, e dia ku e areglo nobo di salario a drenta na vigor. Doño nan di trabou a laga 300 Venezolano bini pa e trabounan den haf por a sigui. Volksbond a bai intermediá pa krea un mihó relashon di trabou entre e doñonan di trabou i nan empleadonan pa drecha nivel di bida di obreronan. Pa mantené e suèldu ku tabata anteriormente na vigor i pa Gobièrnu traha riba lei di labor pa protehá e obrero i evitá ku estranheronan por a tuma nan trabou for di nan. E negoshashon aki a frakasá. Pueblo tabata malkontentu ku e embolbimentu di Volksbond i nan a hala atras. E wèlguistanan a lanta un liga di trahadónan di haf pa sigui ku negoshashon, pero esaki tampoko no a duna resultado.
Dia 15 di yüli un kantidat di 80 wèlguista bou di mando di Felix Chacuto a bai demostrá dilanti ofisina di Koninklijke West Indische Maildienst. Chacuto tabata nan bosero. Djaluna e wèlguistanan a bai plenchi Wilhelmina paso nan tabata konvensí ku e procureur generaal lo a yega na un akuerdo ku e agentenan di barku pa nan por a terminá e wèlga. E masa di hende na Wilhelminaplein a kana bai e ofisina di Koninklijke West Indische Maildienst. Chacuto ku un bandera Hulandes den man. Nan tabata sigui pa polis. Na kaminda nan a topa e procureur general ku a logra pa nan manda un karta pa pidi Red Line pa bai di akuerdo. Chacuto ku no tabata tin niun konfiansa mas a drenta ofisina di Koninklijke West Indische Maildienst sigui pa wèlguistanan. Nan a ataká e empleadonan i bati kibra tur kos. Chacuto a obligá Menkman pa bai kranshi pa firma e kontrato obligatoriamente. Polis a drenta den akshon i kita e públiko for di otro. Nan a saka Menkman. Ku ayudo di militarnan a bira trankil bek. Despues e wèlguistanan a bai Otrobanda pa tira pieda riba e Venezolanonan. Te ora ku polis a yega einan e multitut di hende a baha. Tabata tin kaso di tres morto i 30 persona heridá.
Despues di e wèlga nan a aseptá pa laga Gouverneur Brantjes intermediá. Al final a yega na un akuerdo ku e wèlguistanan lo por a bai traha bek. E tarifa di ora a bira 45 sèn i 80 sèn pa overtaim lo a ser paga. Nan a manda total 14 detenido dilanti hues, den kua di nan Felix Chacuto. Solamente 3 a haña nan libertat. E otro 11 hòmbernan a haña un kastigu di 3 pa 9 aña. Chacuto tabata tin 30 aña i tabata traha komo stoker riba barkunan. Net el a kaba yega na tera i a djòin e wèlguista nan pa bira lider despues. El a haña e straf mas haltu di 9 aña.
Pas mas informashon tokante Felix Chacuto por lesa e siguiente website nan:
https://www.curacaohistory.com/1922-felix-chakuto
