PPapa Wilson Godett tabata presidente di Algemene Haven Unie. E tabata tambe un di e fundadónan di e partido polítiko Frenta Obrero i Liberacion 30 di mei. E a fungi den diferente posishon polítiko manera miembro di Staten, Minister di Labor i asuntunan sosial, Minister di deporte, kultura i rekreashon i tambe e tabata Eilandsraad lid. Tin un kaya i plenchi na su nòmber ku su busto.
Mainta dia 30 di mei tabata tin 5000 wèlguista ku a reuní na Post V. E lider di sindikato Ong A Kwi a manda un delegashon fòrti pa pidi Gobièrnu un biaha mas pa intermediá. E lidernan di empleadonan di haf tambe tabata presente Papa Wilson Godett (1932-1995) ku Amador Nita(1921-1970) bisti den unifòrm di Fidel Castro. Papa Godett a manda e wèlguistanan pa marcha bai fòrti pa baha e gobièrnu.
E trio di Ong A Kwie, Godett i Nita a guia e multitut pa fòrti. E lema tabata “pan i rekonosementu”, “nos lo siña nan respetá nos”. E tabata un marcha pasivo, pero algun hóben desempleá a djòin e wèlguistanan i diferente insidente a surgi. Seguidamente wèlguistanan a konfrontá polis. Papa Godett a bai kalma e multitut i bala di polis a alkans’é. Einan e multitut di wèlguistanan a sali for di man. Entretantu e otro lider sindikal van der Loo a sigui negoshá ku Wescar ku Shell i Shell a disidí di bai di akuerdo ku e eksigensia nan di wèlguista.
potrèt Archivo Nashonal
Un konsekuensia di e wèlga tabata ku Gobièrnu a baha dia 5 di yüni 1969. Na su lugá a bini un kabinèt interino. Staten a ser disolvé pa traha lugá pa e Staten nobo. Na elekshon a partisipá Frente Obrero Liberashon 30 di mei (FOL).
E partido aki a ser lanta pa Papa Godett , Amador Nita i Stanley Brown. E lidernan di partido tabata bista bisti i pèchi di Castro. E partido a haña 22,6% di votonan. Despues di 30 di mei sindikatonan a haña mas influensia riba polítika. Mester a kuminsá tene kuenta ku e pueblo pober, ku tiki skol i Afro kurasoleño. E suèldu mínimo a drenta na vigor i areglo di retiro.
HUMA – 30 di Mei 1969 – Teaser
