DDespues di emansipashon esnan ku tabata sklabisá a keda den un posishon inferior den sosiedat. E grupo aki a forma barionan manera Westpunt, Kenepa, Barber, Lagun, Boka Samí, Montana, Ma Luisa , Weto etc. Den e barionan aki nan a dediká nan mes mas tantu na plantamentu i piskamentu. E otro parti a bai Punda.
Esnan ku a keda biba riba plantashi, a haña un pida tereno komo erfpacht. E personanan aki a keda dependiente di shon, trahando pa shon risibiendo pago den forma di kuido, kuminda òf plaka. E sistema aki yama “paga tera” Den sistema di paga tera e esnan ku tabata sklabisá por a keda biba riba plantashi di e shon. Nan tabata haña bibienda, akseso na awa limpi pa bebe pa en kambio nan ta traha sin pago òf tiki pago pa e doño di plantashi. E antropólogo Rose Mary Allen a skibi un buki tokante e periodo aki ku yama: Di ki Manera.
Migrashon
Na 1883 hopi yu di Kòrsou a bai traha na otro pais, manera Colombia, Venezuela, Santo Domingo, Sürnam i despues Cuba i Panama. Algun famia Sefardí tambe a bai biba den eksterior e periodo aki. E famianan Chumaceiro’s, Salas, de Castro, Pardo, Bais, Gomes Casseres i Senior. Nan a invertí den plantashi di kaña na Cuba. Mayoria yu di Kòrsou a bai Cuba na 1917 pa traha den produkshon di suku. Na 1919 2.730 obrero di Kòrsou a bai traha na Cuba. E antropólogo Rose Mary Allen a skibi un buki: ta Cuba mi ke bai.
Werkgelegenheid en emigratie tussen 1863 en 1920
De ontwikkeling van bewoning buiten Willemstad
DI KI MANERA? Historia sosial di afro-kurasoleñonan, 1863-1917
Fishinan i Kuponan di trabou
Mayoria di e 30.000 habitante di Kòrsou na 1901 tabata pober, solamente 500 persona tabata gana mas ku Ang 1.000. Tabata tin un periodo di sekura entre 1900-1915 ku a sòru pa skarsedat di kuminda.
Tabata tin un grupo ku promé ku abolishon di sklabitut a hui bai Punda i Otrobanda. Tabata mas tantu hòmber ku tabata ehersé un fishi i tabata kue djòp. Despues di emansipashon diferente fishi a wòrdu ehersé. Hendenan a bai spesialisá komo mètslá, karpinté fini, sjouwdó, koredó di ponchi. Tambe tabata tin fishinan manera trahamentu di muebel, platé. Na 1912 tabata tin na total:
70 smet
354 sneiru
419 mètslá
85 karpinté di barku
410 sapaté
57 skreinwèrker
651 karpinté
28 kosedó di bela
Na 1911 tabata tin mas o ménos 35 platé (goud en zilversmeden). Esaki tabata riba un poblashon si 25.000 pa 35.000 habitante.
E karpinténan fini tabata traha muebel di bon kalidat i nan a haña rekonosementu internashonal. Nan a desaroyá un estilo típiko di Kòrsou. Mayoria di karpinté fini tabata traha den nan tayer i tienda na Otrobanda. Entre otro den schrijnwerkerstraat, rifwaterstraat i Sabastopolostraat.
Di tur sorto di bleki, manera di kerosin, zeta, kuminda nan ta kòrta i bati bleki pa traha lampi, trepochi, giter, kanika etc. Hopi biaha na un manera artístiko mes. Nan tabata traha pochi pa basha te i diferente forma di traha bolo. E formanan di Fe, Speransa ku Amor a keda wòrdu usá aña promé santa komunion.
Piskadónan tabata bai buska piska ku un tarai. Dilanti kas di gobernador e piskadónan ta trese nan piska pa e bendedónan di piska bin kumpra nan. Na 1918 nan a konstruí e promé marshe di piska bou di dak. Di e tantísimo piskadónan, tabata tin djis algun ku tabata piskadó komo profeshon. Piskadónan a bira ménos. Kunukeronan a bai buska un bida mas fásil den refineria. Meskos a pasa ku hendenan di fishi, komo ku artíkulonan di afó a pone nan pèrdè oportunidat ku preis muchu mas barata ku lokual nan ta pidi.
Dor di pobresa hende muhé i muchanan a haña nan mes obligá di traha komo kria di kas na Punda, labadó di paña i frumu. Nan tabata traha tambe den flèktumentu di sombré. E trabou aki tabata ser hasi dor di esnan mas pober na Kòrsou. 1912 tabata e aña mas eksitoso di flèktumentu di sombré, komo ku nan a eksportá 146.000 kaha di sombré. E kantidat di trahadó di sombré tabata na 1912 total 5.700 persona.
Den e tempu aki hende hòmbernan tambe tabata traha den haf komo peon òf na wèrfnan. Kòrsou tabata tin un produkto di eksportashon ku tabata fòsfat. E ingles John Godden i e yu di Kòrsou Gorsira a bira propietario i nan dos ta eksplotá minanan. Nan a hasi e haf di Kòrsou mas hanchu ya pa asina nan por transportá e wama pa Oropa, na unda nan ta traha fortalisado di dje. Na mina di e plantashi st. Barbara (Tafelberg) un 500 pa 600 hende a haña trabou.
