NNos grandinan tabata konsiderá Pasku komo un di e fiestanan mas grandi di aña i nan tabata hasi hopi preparashon pa e dia aki. Hendenan ku tabata biba den kasnan bati ku lodo, tabata hunta mèst di baka paden i pafó na muraya di lodo, sera tur buraku ku durante di aña por a daña e kas, blanch’é nechi ku kalki. Tin hende tabata kumpra seis stul òf un stof di korozin. Rònt di kas i dilanti porta mester tabata limpi i henter famia tabata yuda limpia. Esnan ku tabata kasnan di palu òf piedra tambe tabata fèrf i kambia kortina pa kortina dèftu di Pasku.
Tambe tabata tin hopi preparashon di kuminda. Hende tabata mata kabritu. Tabata traha sòpi di kabritu ku su patanan, sòpi di baka, kabritu hasa, bestia chikí ku kònkòmber, mondongo di bestia chikí, stoba, galiña yená, sùlt, pambolo i pandushi. Tabata traha lèter ku chukulati ku pinda.
Potrèt di Zus di Plasa
Nuebe dia promé ku Pasku tur mardugá tabata tin misa di Ourora anto Pasku tabata tin e delaster misa di Ourora.
Aña Nobo
Despues di dos dia di Pasku tabata prepará pa aña nobo. Tabata prepará pékele,salmou, makré, sùlt i ham. Un pober tabata prepará su bòkel. Nan tabata kumpra esensia di anis, anisèt i herebé ku suku blanku, pone ròm aden òf kumpra kolo bèrdè òf kora huntu ku esensia di menta pa traha bibida pa parti na kèlki.
Tin hende tabata bai baila tambú promé bin kas promé ku tiru tira, sensia i bai sigui balia i kanta tambú te mainta. Otro tabata bai anochi pa ora tiru tira nan bula na awa pa frega nan kurpa ku rabu di bakiou. Nan tabata baila tambú paso na kuminsamentu di aña nobo tur hende mester a purifiká i kibra ku aña bieu. Tambú den kombinashon ku kimamentu di sensia tabata e manera pa hasi esaki. E músika di tambú ta saka mal spiritu i influensia negativo (fuku) for di kas. Hende tabata pa rònt den nan bario òf asta den diferente otro bario ku kanto i balia di tambú pa bishita famia i konosínan. Esei nan ta yama paranda di tambú.
Bispu di aña nobo ta huma kas promé ku diesdos or di anochi.
Hende tabata gusta bisti paña nobo aña nobo. Tabata tin un kerensia ku si bo bisti paña nobo bo ta keda haña paña nobo henter aña. Tabata bistí karson djabou hel pero banda robes.
