NNa 1916 CPIM, mihó konosí komo Shell, a establesé na Kòrsou. Despues di 1923 CPIM a kuminsá hasi hopi ganashi, tabata tin mester di mas trahadó. I nan a kuminsá buska trahadó for di otro pais. Shell tabata tin mas rèspèt pa e empleadonan di eksterior. Nan tabata konsiderá e empleado yu di Kòrsou komo floho ku no tin kunes ku nada. Nan no tabata kere ku e yu di Kòrsou tabata apto pa ehersé e trabounan. Konsekuentemente mayoria di nan tabata haña e trabounan ménos bon pagá.
Esaki ta di dos biaha ku a buska trahadó for di eksterior pa traha na Kòrsou. E periodo aki Kòrsou a haña mas gruponan étniko ku ta:
Sürnam, Hulandes oropeo, Rubiano, Boneriano, San Martino, Sabano, Sanistasio, Venezolano, Libanes, Portugues.
Personanan di islanan Karibense Ingles tabata otro di: Sint Vincent, Antigua, Trinidad i Tobago. E karibense inglesnan tabata haña e posishonnan mas haltu komo obrero, pero tambe funshonnan manera shofùr, bewaker i pòrtir. Nan parehanan tabata bini despues pa traha trabou di kas pa e famianan riku. E pueblo lokal tabata usa nòmber pa nan manera somebody, batiyandi òf bedji.
Tambe a bini otro migrante :
- Personanan di islanan Karibense Franses (manera Martinique – Guadeloupe).
- Sürnam nan a bini komo employé i tambe obrero.
- Venezolano, Kolombiano tabata bini komo obrero di zeta
Na 1929 e promé grupo di Portuguesnan for di islanan di Azor a yega Kòrsou pa traha komo obrero di zeta. Portuguesnan tabata biba hopi simpel pa spar sèn, traha overtaim, pa manda pa nan famia i pa despues manda buska nan. Nan étika di trabou tabata asina bon ku nan hefenan tabata pidi nan pa hasi trabou na nan kas pa limpia nan kura na Emmastad ku Julianadorp. Nan tabata laga Portuguesnan tambe traha pa Dienst Openbare Werken komo limpiadó di kaya. Un grupo a bai traha tambe pa Ritz pa bende eiskrim ku garoshi palu friu. Otro a bai traha den agrikultura na kompanianan hortikultura . Asina nan a deskubrí un sektor di negoshi agrikultura i hortikultura ku nan a sigui desaroyá despues di tempu. E élite lokal tabata hür nan komo hardinero, pa manehá nan plantashonnan i otro trabounan di limpiesa.
Trahando duru Portuguesnan nan a lanta segun tempu toko i fruteria ku hinter nan famia. Pueblo tabata yama e Portuguesnan ku tabata bende eiskrim kompader. Portuguesnan a bira un figura konosí den kaya ku nan tabata yama “kompader”. Mas informashon tokante Portuguesnan na Kòrsou por lesa den e buki di Charles do Rego: the Portuguese Immigrant in Curaçao.
Na yegada di trahadónan di diferente pais, CPIM/SHELL a mantené tur grupo separá for di otro. Na Suffisant nan tabata biba den barak, lots ku kampamentu teniendo kada grupo separá. Akinan e Portuguesnan, Kolombiano, Venezolano, Surinameño i personanan di islanan Karibense tabata biba. Na komienso e trahadónan estranheronan no tabata tin pèrmit pa bishitá otro kampamentu, barak ni kantina. Bewakernan di CPIM tabata kontrolá esaki.
E obreronan di zeta di Sürnam, Venezuela, Colombia, i Madeira tabata biba na yegada den kamponan na Suffisant ku Valentijn. Esnan di karibense Ingles, islanan Antia ariba i Boneiru no tabata tin estadia regla. Konsekuentemente diferente bario a krese manera, Fleur de Marie, Cher Asyl, san Souci i Buena Vista.
Den e barionan manera Emmastad ku Julianadorp Hulandesnan tabata biba separá ku bario ku waya i pòrtir. E hulandesnan tabata tin nan mes supermerkado, skol, kancha di deporte i diferente otro fasilidat.
E gruponan étniko na Kòrsou tabata tin diferente religion. Inglesnan di e islanan kolonial britániko i otronan di abla ingles di Karibe a keda biba den nan grupo. Nan tabata protestant ku nan propio sosiedat kristian (anglikano ku metodista) i nan propio edifisionan kaminda nan tabata tene servisio religioso. Otronan nan a bini ku religion Islámiko, Hinduismo, Budismo.
