NNa Kòrsou nos konosé dos sistema di plantamentu:
- Plantamentu den hòfi usando awa di pos.
- Plantamentu di kunuku, dependiendo totalmente di áwaseru di temporada di yobida.
Sistema di planta den Hòfi
Pa plantamentu di hòfi ta importante pa riba tereno tin un pos. Na Kòrsou nos konosé diferente tipo di pos,tin entre otro:
- Pos anchu koba na man ku ta mas o ménos 30 pa 40 meter di profundidat. Pa bora ku mashin tambe ta mas o ménos 30 pa 40 meter hundu.
- Pos di pia ku ta un koba di sierto anchura ku ta kuminsá di plat bai hundu i ta yena ku awa ora áwaseru kai. Na un pos di pia hende i bestia por kana yega te na e awa.
Pa planta na sistema di hòfi ta usa awa di pos kobá na man òf bora ku mashin. Mayoria biaha tin un mulina riba dje ku ta pòmp awa yena den un baki betòn ku tin den e hòfi. Di e baki ta laga awa kore bai na e produktonan ku tin ku planta.
Ku e sistema di planta hòfi, ta planta prinsipalmente berdura, palu di koko i otro palu di fruta.
Plantamentu di kunuku
Plantamentu di kunuku ta dependé kompletamente di áwaseru den temporada di yobida. Ta planta patia, milon, pampuna, bonchi, pinda, kònkòmber chikí i maishi grandi. Ta planta mas tipo di maishi manera dora kora, i maishi for di Haiti.
Ta laga luna di sèptèmber pasa pa planta, ta kuminsá planta e último siman di sèptèmber pa motibu ku sèptèmber ta e luna di mas kayente. Tin dos manera di planta:
- Ta koba un kama: por planta na mas, esei ta nifiká koba buraku ku chapi i planta simia den buraku.Ta koba buraku na un manera ordená banda di otro i tira simia den kada buraku pa despues sera e buraku.
- Sai e simianan riba e tereno pa despues katapila plug e tera. Ta brua tur simia huntu den un èmber. E simia ta haña chèns ku e sistema aki di krese promé ku yerbanan di shimaron.
Kosecha
Luna di febrüari ku luna di mei ta temporada di kosecha. Ora kosecha ta kla doño di kunuku ta pone den temporada di luna yen pa kòrta maishi. Despues di a kòrta maishi ta pone e kosecha den mangasina i maishi den djogodó. Despues ta sigui fiesta di seú pa gradisí Dios ku a laga awa yobe i a protehá kosecha. Tin algun posibel nifikashon di e palabra seú. Den kreol di Guinea-Bissau ta eksistí un palabra seú ku ta nifiká shelu. Esei por enserá ku ta gradisí shelu. Den un kantika bieu di seú nòmber di un Dios Afrikano ku yama Zeula ta bini dilanti. Esei por nifiká ku ta kanta kantika dediká na dios Zeula. Pero niun di e dos teorianan aki no ta konfirmá. Seú ta selebrashon di agrikultura na Kòrsou.
Un parti di e kosecha tabata destiná pa propio uso komo kuminda òf pa warda pa e siguiente temporada di planta. Si e kunuku tabata grandi i e kosecha abundante tabata bende tambe. Den e proseso di kosecha tur hende tabata yuda, esta bisiña, famia i konosí. E kosecha tabata konsistí prinsipalmente di bonchi, pampuna, patia, milon, maishi chikí i grandi, kònkòmber chikí i yambo.
